برنامه جدید پاکستان برای طالبان و تاجیکستان فاش شد!
منابع خبری پاکستان با اشاره به تماس تلفنی روز گذشته سران تاجیکستان و پاکستان، گفتند: عمران‌خان در تلاش برای تنش‌زدایی میان دوشنبه و دولت موقت طالبان است.
به گزارش منیبان؛ از رسانه‌های پاکستانی، با افزایش تنش‌ها بین طالبان در افغانستان و تاجیکستان، «عمران‌خان» نخست وزیر پاکستان برای تنش‌زدایی وارد عمل شد.
وی روز گذشته طی تماس تلفنی با «امامعلی رحمان» رئیس جمهوری تاجیکستان درباره روابط دوجانبه و آخرین تحولات مرتبط با افغانستان تبادل نظر کرد.
منابع دیپلماتیک در پاکستان گفتند: این تماس در حالی انجام شد که مقامات طالبان و دولت تاجیکستان موضع‌گیری های تندی علیه یکدیگر گرفتند.
برخی گزارش ها نیز از برگزاری رزمایش توسط نیروهای تاجیکستان در اوایل هفته به منظور قدرت‌نمایی در مناطق هم مرز با افغانستان حکایت دارد و در مقابل طالبان نیز هزاران جنگجو را به مرز با همسایه شمال شرقی خود یعنی تاجیکستان اعزام کردند.
در جریان تماس تلفنی سران پاکستان و تاجیکستان، طرفین توافق کردند که تلاش‌ها را برای حمایت از ثبات افغانستان هماهنگ کنند.
گفتنی است، تاجیکستان موضع سختی در قبال طالبان اتخاذ کرده و نقض حقوق بشر توسط این گروه به ویژه در ولایت پنجشیر را مورد انتقاد قرار داده است.
اما طالبان انتقاد تاجیکستان از آنها و ترکیب دولت موقت در کابل را دخالت در امور داخلی افغانستان عنوان کردند.
تاجیک‌ها دومین قومیت بزرگ در افغانستان را تشکیل می دهند. آنها نزدیک به ۲۷ درصد از جمعیت این کشور را تشکیل می دهند.گفته می‌شود اکثر گروه های مخالف طالبان به تاجیکستان پناهنده شده اند.
نخست وزیر پاکستان اواخر ماه گذشته پس از بازگشت از اجلاس سازمان همکاری شانگهای در شهر دوشنبه اعلام کرد که طالبان را متقاعد می کند تا با مشارکت افرادی از اقوام دیگر یک دولت فراگیر تشکیل دهند.
وی به طور خاص به گفت‌وگوی خود با رئیس جمهوری تاجیکستان در این مورد اشاره کرده بود.
